اغانى مختارة

كلمات أغنية كسلا
كلمات الشاعر/ اسحاق الحلنقي
غناء الفنان / التاج مكي
============================

ظلم الزمان الخاني يا ريتو لو كان خـــــــــانك
ليه جرت واتنكرتي ليه لي الساب ديارو عشانك
قدر عشانك كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
كلمني قوليها فاكر ليالي القــــــــــــــــــاش
لمن الحنين عاودنـــــــــي بعطفك الجــــياش
جفيت حبيب ما خانك من نور بسيمتك عاش
انا تاني ما بتلقاني يوم في طريقك مــاش
قاصد مكان في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
صوت السواقي الحاني ذكرني ماضي بعيد
وعلى الرمــــــــــال آثارك طرتني ليلة عــيد
المني قلبك ينسا يرفس غــــــــــلاوة الريد
باقي الطريق بمشــــيهو خليني فيهو وحيد
والحب عذاب في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
فرحــــــــــــت ليالي الريد نداوة البسمات
خلتني أبكى
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها






فايت مروح وين
كلمات الشاعر / اسحاق الحلنقي
غناء الفنان / التاج مكي
===========================

فايت مروح وين ...
لسة الزمن بدري ...
خليك شوية عشان ...
جنبك يطول عمري ...
دار الفرح والريد ...
تلقاني من أهلها ...
ومين اللي ما بعرف ...
طيب شباب كسلا ...
يلاك بعيد نرحل ...
لدنيا حنية ...
نعيش لوحدينا ...
سيرتنا منسية ...
وأسقيك مياه توتيل ...
عشان تعود لي ...
بين الضفائر بان ...
وجه القمر طلا ...
وكيف قلبي يتنقل ...
صبرني يا الله





ما عدت فادر انتظر
كلمات مصطفى سند
غناء صلاح مصطفى
===================

ما عدت قادر انتظر
سامحني غلطان بعتذر

ما كنت قايل من عتاب تحكم علي ّ
بالوحدة والشوق والعذاب
انت القبيل شلت الصعاب
في دربو عديت ألف باب

لو انت زهو الحسن في عيونك بدا
خليك أمين في العشرة لي آخر مدى
كيف تنسى لهفة قلبي ليك
تنسى الحنان الكان لديك
لو مرّ اسمك في البعيد شايلو الصدى
بلّ النسايم الحلوة بي قطر الندى
تلقاني واقف مرتعش ضارع إليك

عارف تمام ده المستحيل
الحُسن والطبع النبيل
يغضب يجور
لحظات خصامو المُره تتمدد شهور
صدقني لو أغلط معاك دايماً أقول
انت الأصيل انت الوفي
عن حبي ما ممكن يميل
يضحك سلام الدنيا في عيونك دليل
من بعدو ما داير دليل
يرضو غلطان وبعتذر




كلمات اغنية الماضى والحاضر
الماضي والحاضر - صلاح مصطفي
========================

إنت لو فكرت تتذكر غرامك وتبكي ماضيك البعيد
برضي زيك كنت عاشق وكانت أيام عمري عيد
========================
كنت عايش في سعادة وقلبي فرحان بي حبيبو
ياما شمتو الناس عليهو لما حاول يوم يسيبو
الفراق قسموهو ليهو وقلبي رضيان بي نصيبو
تمضي أيامو في عذابو وفي ربيعو يكون وحيد
========================
لما شفتك رحت ناسي كل ناسي الكانوا قربي
بعت غيرك واحتضنتك يا حياتي جوه قلبي
كم رويتك بي حناني وكم سقيتك طهر حبي
وافتكرتك تبقي أملي وتبقي زادي لباقي دربي
لو نسيتني ..... أو جفيتني
في العذاب كم متيم وكم في الغرام كم من شهيد.
=======================
يا حبيبي إيدي وإيدك نبني جنتنا الصغيرة
تحكي لي واحكي ليك عن أمانينا الكبيرة
الحنان نتغذي بيهو والحنين يبقي النفيرة
يا حبيبي قلبي عندك وانت فيهو تحيا بيهو
و تبقي ليهو طوق نجاتو ونور حياتو
يا حبيبي .






شـــــــــــال هم فــــــــــرقتك
غناء حمد الريح
=========================
شال هم فرقتك قلبى معاك

ياريتو كان يرحل

هو جنبك ومشتهيك ياعيون

وكيف كيف وكيف كيف

لما الفراق يحصل

انشاء الله مايحصل

بريدك ياشقى الايام

كان بيكى الحبيب يسعد

واسهر نجمى عز الليل

بعد روح صباحك جد

بريـــ بريدك بريدك ــــدك

وابكى معاى عيون احباب

عشان اسف الدموع يشهد

لا كان الفراق منيه

ولا فرقه عيونك وعد

وكيف كيف كيف

لما الفراق يحصل

انشاء الله مايحصل

مجبور قلبى يتعلم

بعد ولف عليك اقسى

عشان لو لحظه تنساكى عيون

مااتعودت تنسى

انا الفارقت مرساكى

قبل اشواقى ماترسى

واصابح بكره كيف العيد

وعايش فرقتك هسا

ومعقول قلبى بس يقسى

وكيف كيف كيف

لما الفراق يحصل

انشاء مايحصل





كلمات أغنية : عارفك جميلة
غناء الفنان / زكي عبد الكريم
===================================

اميرة الشباب يا السمحة أنا جايك عريس
بي كتب الكتاب يا الملكة مهرك مو رخيص

عارفك جميله وزايده في البنوت حلا
المال عليك يا غالية أبداً ما غِلا
لكن ظروفنا القاسية كيف بنبدلا
فاضل وحاتك بس نفوس ندللا

من قلبي دايرك ليّ شريكه وأم عيال
لكنو قربك ليّ بعيد صعب المنال
يعجبني فيك لو قلتي أنا ما دايره مال
وأصلو العرس بالفاتحة يا ناس ما حلال

بت المدن يا الواعية يا الدارسة الكتاب
غلا المهور حاربيهو ما تخليلو باب
إتمنى خت الحنة وأعرض في السحاب
وأرقّص بنات حلتنا دايرات الشباب

عايش وحيد بلدي فيها الحور بنات
عاشق جمال بنوتنا سمحات الصفات
قولوا خير باركوا العرس يا الأمهات
على الشباب خايف يفوت فيهو الفوات



كلمات اغنية الذكرى المنسية
غناء الفنان / النور الجيلاني
============================

يا صحوة الذكرى المنسية
من بعدك وين الحنية
بتعدّي مواسم وتروّح
والذكرى بتصبح أبدية
** ** ** **
يا مرسى الفرحة يا واحة
قبلة عيني وصباحا
من بعدك دنيا بتشقيني
وخطايا بعدك تواها
الحزن الخيّم في قلبي
وأيامي الفاتت أفراحا
لا فرحة بدونك بتدوم
لا قلبي وراك لقى الراحة
** ** ** **
عصفورنا الروّح كلمتو
وصيتو يكوس يسأل عنك
اسمك في جناحو سطرتو
بحناني الفايح منك
في أي مكان لو قابلتو
أنا شوق الدنيا علي منك
بتعدّي مواسم وتروّح
وبتجيني أظنك وما أظنك
يا صحو الذكرى المنسية
من بعدك وين الحنية
بتعدّي مواسم وتروّح
والفرقة بتصبح أبدية
** ** ** **
الرحلة طويلة
مكتوبة عليّ وبمشيها
المسافة بعيدة
ومحسوبة خطاوي وجاييها
الغنية حزينة
مليانة محنة وأغنيها
والذكرى الباقية معاي منك
يا ريتو قلبك يصحيها




مع تحيات ود السعدانة 00 تاجوووو ووووو ج
ان شاء الله تنال رضاكم